ელდარ შალამბერიძის სახელობის ხელოვნების სკოლა
ზესტაფონი, ბიბილაშვილის ქ. 7
ზესტაფონის ცენტრში, ბიბილაშვილის №7-ში მდებარე ხელოვნების სკოლის რეკონსტრუქციის მიზანია თანამედროვე, მოქნილი და კომფორტული საგანმანათლებლო გარემოს შექმნა, რომელიც ხელს უწყობს სასწავლო და შემოქმედებით პროცესს. პროექტი განსაკუთრებულ ყურადღებას უთმობს ფუნქციურობას, ბუნებრივ განათებასა და სივრცის კომფორტულ გამოყენებას.
დიზაინის კონცეფციის მთავარი მახასიათებელია განმეორებადი თაღოვანი ფორმები, რომლებიც შენობის არქიტექტურულ სახეს განსაზღვრავს და ტრადიციულ მოტივებს თანამედროვე ესთეტიკასთან აერთიანებს. თეთრი ფასადისა და თბილი ტერაკოტისფერი ელემენტების კომბინაცია ქმნის გამოკვეთილ და ჰარმონიულ კომპოზიციას.
დიდი მინის ზედაპირები ინტერიერსა და გარე სივრცეს შორის ვიზუალურ კავშირს აძლიერებს, ხოლო ბუნებრივი განათება ინტერიერის აღქმას უფრო ნათელსა და ღიას ხდის.
განსაკუთრებული მნიშვნელობა ენიჭება შიდა ატრიუმს, რომელიც შენობის ცენტრალურ სივრცით ბირთვს წარმოადგენს. მინის გადახურვით შექმნილი ბუნებრივად განათებული სივრცე აერთიანებს შენობის სხვადასხვა ფუნქციურ ნაწილს და ქმნის საერთო გარემოს მოსწავლეების, მასწავლებლებისა და ვიზიტორებისთვის.
